Sam Pek tengok sampay ter-pranjat
Bangun kan diri nya chapat chapat
Apa kana adek datang ber-dakat
Bukan kah sahya suda ber-pakat 

Eng Tai dakat sengaja usek
Buat buat mengigor sampay ber-kata
Hye Yoh Hye Sam Pek Ankoh sudara
Laki bini lah kita ber-dua 

Sam Pek triak Eng Tai s?kuat kuatan
Kata kapala adek masok saitan
Sobat sudara suda di aku kan
Jangan di chakap yang  bukan bukan 

Eng Tai pun buat lah tidor lelap
Swara nya pun suda lah lalu senyap
Hati Sam Pek baru rasa sedap
Amek lah bantal tidor meniarap 

Sam Pek takot Eng Tai buat sengaja
Amek salimot s?lubong smua
Tidor diam diam tak brani ber-swara
Baru lah masok di kayang-an dewa 

Eng Tai dengar Sam Pek berdengkor
Dia golek kan badan datang berchampor
Amek tangan sama plan dia plok
Sama lah lelap dia orang tidor 

Ayam kokok hari pun siang
Orang kaday bukak tengtang
Sam Pek sedar ter-gambang gambang
Rasa badan nya orang pegang 

Sam Pek bangun ter-lalu marah
Marah kan Eng Tai kurang ajar
Di panggil oleh adek sudara
Sahya dengar apa Ankoh kata 

Eng Tai buat tidak katawi
Tanya kan Sam Pek Koh apa ini
Gua tidor lelap s?kali
Tidak lah tau apa kan jadi 

Jangan ankoh amek kan marah
Kalau sala Aukoh bolay ajar
Kita suda mengaku sudara
Sahya dengar apa Ankoh kata 

Orang kaday itu datang ber-panggil
Di bilang nya hari suda trebek
Mari Baba minom ayer tay
Di tuang kan kopi susu dua changkay