Lemo manis lemo jambua Lemo prot asam paya Chili tawyu di chelop chemera Orang bunting ter-lampon suka Langsat malim langsat mengkabol Jambu ayer tanam-an Rio Chiku Palembang ter-lampon masohor Chin Kay makan kasi Chek Umeah Po Bua sentol bua kachapi Bua salak bua manggi Bua Kledang ber-champor tamponi Bih Swan makan suka s?kali Rambutan ini rambutan Batawi Durian me-nama kacha puri Rambay gantong ter-lampon mani Habis di makan mau chari lagi Chrita pulak kuay kuay Apong balek onday onday Kuay mengka gula pasay Umpo durian di bungkus nya upay Pulot tatar siantan ber-pra Utu mayang apong mong kua Goreng pisang di chelop gula Makanan oleh orang tua tua Utu piring utu bambu Epoh epoh kuay bolu Kuay bong kong mau lah ber-sudu Orang makan tak putu putu Chrita pulak manisan manisan Lemo ke-ah masak di hutan Bua paya di buat prasan Chochok bambu tarok di dalam puan Suda habis orang kaday itu ber-kata Dia panggil pulak Inchek Baba Apa mau kabar kan kita Bolay lah sahya kamas kan sedia Eng Tai panggil Sam Pek Koh Kita sama satu tempat dudok Apa mua bolay lah Ankoh tunjok Kita makan ber-champor gaoh Sam Pek ber-triak Eng Tai Sobat Anday Apa makanan pun gua tak pilay Asa bolay sedap kan bibir Kanyang kan prot tak mau lah labay Eng Tai bilang sama orang kaday nya Kita mau makan laok China Asam pedas tidak lah ber-guna Nasik ber-buku tak bolay kunya