Tangan nya pegang satu pedang
Blakang dia jugak dia chinchang
Orang bandera itu lari men-datang
Amek bandera di tutop kan blakang 

Orang depan pukol brembeng
Lain orang pukol lo tok teng
Ada yang angkat chye kee teng
Ada yang pakay muka topeng 

Orang China punya hibor
Kapala kayu di pikol dengan Kio
Tenga jalan puas men-lupor
Baru masok kan dalam Bio 

Kapala kayu pangkal nya burok
Di pahat kan orang dengan pengatok
Muka nya di ukir pantat di buat dudok
Mau menjadi kan satu Datok Datok 

Orang bli tarok kan di atas Tok
Ayam itek babi ber-longgok
Dilin di pasang Heonh Swa di chochok
Mau kasi makan kapada Datok 

Nyonya Nyonya datang soja
Mintak tolong kapada Ong Yah
Tolong lah jaga kan laki gua
Jangan kasi dia pergi blayer 

Kalu dia pergi lain negri
Tuntu lah situ dia ber-bini
Sama siapa gua ber-suka hati
Dudok bujang sampay mati 

Datok ter-diam diam di atas Tok
Dia ber-soja sampay ber-jongkok
Atas batu kapala dia katok
Hadat itu peng-habisan burok 

Datok itu tak mau ber-kata
Ada pulak kayu dua bla
Di lambong kan sampay ber-bacha
Buatan itu s?perti ber-tau kan tanya 

Ada pulak satu tabong
Pantat nya brisi tangan nya kosong
Di tarok kan duri nibong
Rupa s?perti batang tropong 

Di gonchang oleh ber-juru juru
Jatoh satu di atas batu
Pungot mari kasi Soo Hoo
Mintak lah Chiam Si gua mau tau