Bras penawar nasik kamudi
Ikan di goreng ber-jeni jeni
Kalu mau tau smua s?kali
Bolay lah sahya kasi harti 

Ayam di masak kari Kling
Itek angsa anchor di goreng
Negri ini tidak orang ter-banding
Kalu makan haram tak mau ber-paling 

Ikan Siam ikan tengiri
Ikan Bawal di masak kari
Dudok diam jangan peduli
Makan tak sedar di dunia lagi 

Tambah pulak ada ikan Siakap
Gerang asam suda ku siap
Kalu makan jangan ber-chakap
Baru bolay merasa sedap 

Baik baik ber-tanam padi
Sayang s?lasay di tepi paya
Baik baik membawak hati
Jangan bolay kasay bruba 

Layang layang siku nya besi
Jatoh mari di kampong Bali
Kasay sayang jangan brenti
Biar bolay ber-sampay mati 

Sam Pek triak Eng Tai adek ku
Prot ku lapar suda ber-juru juru
Chari lah tempat kita ber-tunggu
Hari petang suda mau lalu 

Eng Tai lah jawap ber-triak Sam Pek Hia
Depan ada satu kaday China
Mari lah kita dakat ber-tanya
Apa ada di dalam kaday-nya 

Suda lah sampay itu kaday China
Dia orang suda lah sama ber-tanya
Apa di jual dalam kaday nya
Kasi lah tau kita smua nya 

Orang kaday itu jawap ber-kata
Kaday kita smua nya ada
Chukop makanan dengan bua bua
Nasik laok smua sedia