Saya pasan sabagitu tapi
Abis bacha simpan rapi rapi
Sabab bar-chinta manjadi mimpi
Tider di tanga jato di tepi 

Saya mangarang eni charita
Dangar-la tuan sakalian rata
Dangan sa-batul-nya saya bar-kata
Sabab mangimpi manjadi chinta 

Saya mangarang blom mangarti
Tamba pulak kusot di hati
Pi-kay dan chinta datang bar-ganti
Pagi patang tidak bar hanti 

Di dalam hati ta-lampun sadi-nya
Ma-nangong chinta sabab mula-
nya
Hati bar-chinta pulak tak suda-nya
Jikalu lambat apa jadi-nya 

Jikalu lambat bagini rasa
Tantu badan rusak binasa
Sabab bar-chinta sa-nanti ahsa
Nyawa ma-nangong tak kuasa 

Chantek roman ta-lampun trang
Karja chinta saya sa-orang
Hati tak bolay dapat di larang
Mala tamba tak ada kurang 

Hati bar-chinta saya tidur-kan
Tak dapat juga di libur-kan
Adek sa-orang yang di pikay-kan
Makan seri lupa kapur-kan 

Ada-ka tat-kala swatu hari
Saya bar-jalan sandiri diri
Dapat tar-pandang muda bastari
Eni-la dia yang saya chari 

Di-dalam hati saya bar-kata
Mari adek chahaya makota
Bolay-ka kira-nya di pandang mata
Sangka dapat bukit par-mata 

Di-mana hati tak-ka binasa
Awak tak karuwan di rasa
Tahan birahi sa-nanti ahsa
Badan managong tak kuasa 

Saya duduk dangan sendiri
Manahan chinta saganap hari
Ambil kartas saya pikay-ri
Manulis sahyer bar peri peri 

Duduk bar-chinta takda bar-suda
Di libor dangan mangarang mada
Terbit pekay-ran di dalam dada
Langit yang tinggi di pandang randa 

Talim dan samba ka-dua tangan
Surat kiriman untong untongan
Sabab-nya hati ka-bimbangan
Jangan bar-chinta ka-panjangan 

Bagi-mana akal bolay di tahan
Datang birahi tak ka-sudahan
Harap adek punya kasian
Minta bar-gantong dangan plahan 

Saya chakap trang dan trus
Chintakan adek manjadi kurur
Hati yang gila tak-kan  urus
Mangkok du pegang di sangka 
erus 

Sabab-nya saya kata bagitu
Chinta kan adek tidak bar-waktu
Pulak pikay-ran tidak yang tantu
Sarupa di kamat se dewa ratu 

Parkata-han tidak saya samuni
Malengkan minta di kasianni
Mananggong chinta sakian eni
Bar buat jahat tidak brani 

Tidak sakale saya bar-joosta
Sa-batool-nya saja saya bar kata
Adek sa-orang di mata mata
Manjadi chakap sabagi lata