Sin Senh dengar banyak suka
Di puji oleh orang muda
Chakap s?perti orang tua tua
Kasi tempat mengaji ber-dua 

Sin Senh kata blakang bilek
Lu bolay tidor dua bradek
Ter-tapi dalam banyak sempek
Mau lah tidor berempet rempet 

Eng Tai kata tidak kanapa
Gua ber-dua bagi sudara
Sin Senh kasi satu meja
Gua bolay simpan apa apa 

Hari pun suda masok petang
Anak muret smua pulang
Sin Khek bawak satu dulang
Panggil dia orang masok blakang 

Kata Baba mari makan
Sin Senh suda pergi ber-jalan
Nasik dia sendok dalam pinggan
Tarok kan dia orang punya depan 

Laok nya angkat ber-mangkok mangkok
Chukop dengan sempet sendok
Sam Pek Eng Tai suda lah dudok
Makan ber-sama sama satu Tok 

Suda dia orang habis makan
Sin Khek datang kamas kamas kan
Kamas kan mangkok dengan pinggan
Dia bilang Sin Senh ada pesan 

Sin Senh nanti pulang malam
Lu orang tinggal diam diam
Api jangan kasi padam
Sin Senh jalan takot terentam 

Suda lah dia orang dengar chakap
Masok di bilek suda glap
Plita di pasang api tak tatap
Minyak tana banyak asap 

Dudok dia orang sama ber-dua
Api nya glap meraba raba
Bangku ada kaki tiga
Meja mereka pantat nya pacha 

Panggil Sin Khek mari kata
Kasi gua satu plita
Biar dapat buatan Aropa
Pasang api bolay menyala