Jee Kow malam bukak pesta
?Wee Law? bernama sudah lah nyata
Macham laok berator di meja
Babi-chin, itek-tim pun smua ada 

Bertamba pulak hati-babi
Babi-chah, chapohye, prot babi
Itek-seohnh, jerok sesawi
Datang pong-tay pulak satu lagi 

Anak chuchu smua sudah berjumpa
Siapa boleh hati tak suka
Makan minom bersuka riya
Masing-masing dudok tertawa 

Bukak Stout, Brandy, Whisky
Sa-orang sa-glass sudah di bagi
Sklian yang ada muka bersri
Rasa-nya suka di dalam hati 

Sa-taun sa-kali bahru begini
Bukan-nya bikin sa-hari hari
Anak-bua smua kompol ka-mari
Kasi slamat Jee Kow May ini 

Yang dekat, yang jaoh pun datang
Anak chuchu dudok bertentang
Masing-masing bila terpandang
Pikiran yang susa pun smua hilang 

Betol lah suka boleh di bilang
Mau jumpa bukan-nya gampang
Niat di hati bukan kapalang
Mau berjumpa Taun Bahru yang datang 

Bunyi jam pukol dua-blas
Masing-masing bangun lah dras
Bukak pintu bakar kertas
Amek api pasang petas 

Anak chuchu datang ka-mari
Membri slamat hari ini
Umor panjang Allah membri
Ber-dokwa serta mura jerki 

Angpau pun datang sana-sini
Yang kechik tentu dapat yang besar kasi
Yang tua pulak yang muda membri
Kasi slamat sa-taun sa-kali