Eng Tai panggil Sam Pek Koh
Apa kana lu begitu bodoh
Sukat sudara lah mau ber-champor
Apa guna dudok jaoh jaoh 

Sam Pek tak bolay lah dapat di jawap
Ikot kan Eng Tai punya chakap
Nasik laok suda di siap
Makan sama rasa ter-lalu sedap 

Dua dua suda habis makan
Orang kaday itu datang kamas kan
Mintak tuala sapu tangan
Basoh muka habis ber-jalan jalan 

Amek ayer tay tuang di chawan
Kuay kuay pun ator di pingan
Chukop dengan bua manisan
Panggil Towkay Baba mari makan 

Eng Tai dan Sam Pek dudok ter-tawa
Minom ayer sama ber-dua
S?orang amek s?kaping Koya
Sampay makan sampay ber-kira 

Eng Tai lah kata Sam Pek Koh
Hari petang suda lah lohor
Bilang dia orang s?pata tutor
Mintak lah menumpang tidor 

Sam Pek kata itu orang kaday
Gua mau lah sewa satu bilek
Gua mau tidor dua bradek
Nanti jalan besok hari trebek 

Orang kaday itu ber-panggil Baba
Bilek satu ada sedia
Tempat tidor takda yang dua
Kalu mau bolay lah bechara 

Eng Tai bilang sania Sam Pek
Kita ber-dua adek bradek
Bukan baik sama satu bilek
Senang ber-chakap senang ber-golek 

Sam Pek jawap sampay ber-kata
Sama satu bilek pun baik lah
Ter-tapi tempat tidor satu saja
Mana macham tidor ber-dua 

Eng Tai ber-panggil Sam Pek Koh
Apa kana begitu bodoh
Kalu suka Ankoh ber-champor
Labay baik ber-sama tempat tidor