Anak muret smua menyembah
Mintak ampon mengata suda
Rotan di pukol sampay pata
Sin Senh pun blom habis marah 

Sin Senh maki anjing babi
Sari sari bikin gua kek-khi
Kalu ber-klai lagi s?kali
Nanti gua haloh smua pergi 

Bukan datang blajar pandai
Dia orang datang ajak ber-klai
Risemi s?perti anak Supai
Tak bolay ikot macham si Eng Tai 

S?karang smua bolay pulang
Pergi pikir kemdian di blakang
Kalu baik bolay datang
Kalu jahat tuntu gua pesiang 

Habis lah nasihat Sin Senh bri
Masing masing ber-jalan pergi
Sin Senh baru bangun ber-diri
Tengok Eng Tai Sam Pek ada mengaji 

Hari itu hari Chit Sek
S?orang Tay Yan satu ringget
Sin Senh bli ayam itek
Kasi makan anak muret 

Anak muret smua datang
Dudok makan s?bagi kumbang
Habis s?dulang angkat s?dulang
Dia orang makan habis chengtang 

Bagi ulat dia orang melupor
S?luar baju smua kotor
Kemdian dia orang main ber-guroh
Sampay menjadi besar gadoh 

Satu angkat sama bangku
Satu berentam sama sudu
Nang ada datang ber-bantu
Nang ada lari ka-pintu 

Datang satu pegang towchang
Blakang satu plok pinggang
Ber-gumpal dia orang sampay tertunggang
Sin Senh pun ber-lari datang 

Dia orang tengok banyak ter-pranjat
Sin Senh bawak rotan s?krat
Satu satu Sin Senh raimbat
Di maki binatang banyak jahat