Ankoh tolong amek kan tuala
Slubong kan adek dari kapala
Badan gua usol tidak ter-daya
Pimpin kan adek jangan lupa 

Sam Pek amek kan tuala pekan
Di tutop kan Eng Tai punya badan
Eng Tai bangket ter-chuan chuan
Sam Pek pimpim sama ber-jalan 

Sampay chinchiwan Sam Pek ber-antar
Datang satu macham angin besar
Eng Tai buat buat mengletar
Di plok Sam Pek dia gegar gegar 

Dengar ber-kongkong swara anjing
Hati Sam Pek banyak lah bising
Kata adek dras lah kenching
Bolay lah pulang tidor baring 

Eng Tai masok dalam chinchiwan
Pintu di luar Sam Pek nanti kan
Puas puas Eng Tai ber-telan
Habis dia jongok mati kan badan 

Sam Pek tanya Eng Tai kanapa
Lama kenching blom suda
Ini angin angin utara
Jangan adek buat pura pura 

Eng Tai kata gua ada menuntot
Telan napas kluar kentot
Adek ada kenching ter-bantot
Rasa ter-tahan di dalam prot 

Angin di luar banyak lah kras
Adek kenching tak bolay lapas
Ankoh tutop kan pintu lakas
Bolay lah adek kenching dras 

Angin pun datang ber-dru dru
Sam Pek lakas tutop kan pintu
Di luar chinchiwan Sam Pek tunggu
Dengar di dalam bunyi chu-chu-chu 

Habis dengar pintu berkatok
Swara s?perti Eng Tai batok
Pintu bukak Sam Pek masok
Tengok Eng Tai ada ber-jongkok 

Sam Pek tanya adek sudara
Lama kenching blom suda
Adek kanapa tak mau ber-swara
Kasi lah tau sama gua