Mari lah kita pergi sana
Mintak obat ber-sama sama
Kalu makan bolay ber-guna
Kita branak ampat lima 

Sam Pek dengar sampay tempelak
Kata adek banyak lemak
Kalu d?laki bolay branak
Smua prompuan nanti ter-champak 

Eng Tai jawap sama ter-tawa
Apa kana Ankoh marah
Kalu tak mau pun suda lah
Adek chakap chuma chuma 

Mari lah kita masok dalam
Kita dudok diam diam
Hari pun suda dakat malam
Api di pasang balek padam 

Sam Pek baru lah brati
Ajak Eng Tai ber-jalan sama
Masok bilek pasang plita
Bukak buku ber-sama bacha 

Hari pun suda jaoh malam
Minyak habis api pun padam
Tutop buku bantang tilam
Masing masing tidor diam diam 

Eng Tai tidor ber-golek golek
Satu malam mata nya chelek
Kaki nya antok tangan nya tarek
Sam Pek tak mau ber-balek balek 

Hilang Eng Tai punya cherdek
Chari akal pusing blek
Di blakang Sam Pek dia usek
Sam Pek sorak ter-pakek pakek 

Apa kana adek begitu
Tak bolay tidor tuntu tuntu
Blakang sahya adek seru
Orang tau banyak malu 

Adek banyak kurang hadat
Ada kah Kiat-pye brempet dakat
Lagi s?dikit adek rapat
Gua nanti pinda tempat 

Eng Tai triak sudara
Jangan lah Ankoh amek marah
Gua mengigor bukan nya sengaja
Tidak lah lagi bikin sala