Sahya karang satu chrita
Sam Pek Eng Tai orang ber-dua
Ka-turun-an di salin surat China
Di bri bacha sudara sudara 

Dengar mari anak Peranak kan
Eng Tai lah satu Nyonya Prompuan
Bapak nya kaya bagi Sultan
Rumah nya ber-tengkat tengkat di tengah medan 

Mak si Eng Tai ber-kabar sama Bapak
Anak kita Eng Tai saja
Adek kakak sudara pun tidak
Pada siapa kita ber-gantong tua 

Jawap Eng tai sampay ber-tanya
Sudara banyak apa lah guna
Sunggu sunggu sahya anak ber-tina
Banyak lah tau isarat dunia 

Aya bonda kalu membri
Anak mau lah blajar mengaji
Tempat yang plajaran anak pergi
Bila kan panday anak ka-mari 

Hang Chew lah itu satu negri
Banyak lah orang pergi mengaji
Guru nya banyak panday s?kali
Situ lah tempat anak brenti 

Bonda nya suda ber-dengar kata
Hati di dalam banyak lah gorba
Anak ku Eng Tai bukan kah Nyonya
Mana bolay pergi ka-sana 

Negri Hang Chew besar satu kota
Banyak Baba Baba ada di sana
Kalu jumpa anak ku Nyonya
Tuntun lah dia orang bikin aniaya 

Aak s?perti bunga Bida-dari
Macham di kembang pagi hari
Kalu di chiom wangi s?kali
Kalu di petek lah mujo bistari 

Chantek lah sunggu serta molek
Chukop seredang dangan pendek
Kalu di kana kan sutra Songkek
Bagi chita orna nya chelek 

Kalu suda dapat satu binchana
Dengan tipu orang akan ter-kana
Bagi intan hilang chaya nya
Adu kan batu pun tidak ber-guna 

Hye Yoh Hye anak ku bijak bestari
Baik baik pikir di dalam hati
Jangan bolay menyasal kemdian hari
Itu lah Bonda kabar dengan pasti 

Jawap Eng Tai dengan ter-tawa
Aya Bonda amek menarok susa
Sunggu sunggu lah anak satu ber-tina
Bukan nya muda bolay dapat binchana 

Kalau ada pun banyak Baba Baba
Bolay lah anak ber-champor juga
Pakay-an tukar biar ber-sama
Jangan dapat orang ketara 

Eng Tai lah suda habis ber-chakap
Masok di bilek lalu panyap
Bungkusan di bungkus payong di siap
Endah ber-jalan chepat chepat 

Buang pakian tukar pakian
Pakay-an Baba suda di pakay kan
Saku nya ada kiri dan kanan
Chukop dengan kain sapu tangan 

Eng Tai kluar pintu serambi
Mintak ijin Aya Bonda membri
Eng Tai mau ber-jalan pergi
Negri Hang Chew tempat mengaji 

Aya Bonda pandang tak ter-kata kata
Pandang kan Nyonya Eng Tai hati gorba
Pakay-an sunggu ber-sama Baba Baba
Ter-tapi di dalam hati dengan sangsara 

Aya nya bilang sama lah Bonda
Pergi lah amek ringget atau perak
Kasi Nyonya Eng Tai buat blanja
Jangan ka-putusan menjadi susa 

Bonda suda masok di dalam bilek
Amek perak ber-champor ringget
Kluar di kasi Eng Tai di amek
Bungkus kan kain sutra batek 

Eng Tai amek ringget ber-bungku
Agak nya brat ada s?ribu
Mintak menyamba Aya Bonda ku
Ini lah anak mau pergi ber-guru 

Aya Bonda lah banyak ber-pesan pesan
Pesan Nyonya Eng Tai ber-jaga badan
Bukan nya muda kluar ber-jalan
Banyak lah antu banyak lah saitan