Gunong daik ber-kota tinggi
Nampak mari gunong s?ligi
Alang chantek intan ber-duri
Mana sama orang ber-budi 

Makan minom dia orang ber-dua
Sari sama dudok chrita
Macham kitab dia orang bacha
Panday masohor dalam s?kolah 

Banyak anak muret mengaji
Sin Senh tidak kasi peduli
Eng Tai Sam Pek Sin Senh puji
S?klian ajaran Sin Senh bri 

Sama dudok sama mengaji
Dudok blajar tidak brenti
Tidor malam bangun pagi
Buku kitab smua harti 

Sin Senh dudok sampay melaytir
Eng Tai Sam Pek orang yang panday
Siang malam tidak ber-cheray
Dalam majelis bolay di pakay 

Anak muret smua begini
Tidak lah gua susa kan hati
Sari sari dudok kek-khi
Di pukol dia orang tidak brenti 

Pada Eng Tai Sam Pek ber-dua
Eng Tai s?orang gua suka
Akal chukop panday ber-kata
Tidak susa gua ajar 

Sin Senh panggil Eng Tai s?orang
Eng Tai dras ber-jalan datang
Sin Senh dudok ter-pandang pandang
Eng Tai jugak gua sayang 

Kata Eng Tai anak muret
Kanapa lu begini chantek
Chukop panday serta cherdek
Dalam dunia paya di charek 

Lu suda kah ada ber-tunang
Kalu tidak lu bolay bilang
Supaya hati Sin Senh pun senang
Anak gua lu bolay ber-pinang 

Jawap Eng Tai sampay ber-kata
Sin Senh jangan amek marah
Tunangan anak s?perti dewa
Maka Bapak nya orang kaya