Eng Tai dengar sampay ter-tawa
Kata nya Ankoh panday pada gua
Chrita orang toksa di bacha
Mari lah kita chrita ber-dua 

Toksa chari orang yang panday
Abang Hay Yam bolay bikin satu sahir
Banyak baik kita pilay
Biar bolay masok di pikir 

Sam Pek panggil Sobat Anday
Bukan senang memikin sahir
Huruf di tikam bacha tak bolay
Siang malam dudok ber-pikir 

Pikiran kalu tak bolay tetap
Jangan blajar karang-an kitab
Orang bacha pun sampay menguchab
Orang dengar pun t?lingar nya sembab 

Kita blajar s?bolay bolay
Harti chukop sampay panday
Kalam pun tetap huruf tak kilay
Baru bolay mem-karang Sahir 

Eng Tai dengar ter-lampon suka
Dengar kan Sam Pek panjang chrita
Sampay ber-chakap sampay ter-tawa
Suda sampay satu kota 

Kota nya itu banyak lah tinggi
Tembok nya batu ber-lapi lapi
Kliling nya ada ampat per-sagi
Pintu nya chantek ber-suji suji 

Besar pintu di tenga kota
Kluar masok orang di bawa
Yang ada jual kuay ada jual bua
Yang ada besu muka ada ter-tawa 

Sam Pek Eng Tai sain ber-dua
Suda sampay di tepi kota
Tengok orang pegang bandera
Kata ini hari berarak Ong Yah 

Datang orang nya bersorak sorak
Kata Tang Chee nya pegang kapak
Inchek Inchek siang siang ber-kuak
Dia mau bla kapala otak 

Tang Chee itu orang ka-turun-an sedia
Dia lompat lompat tidak ber-kira
Mulot nya ber-chap chap bacha tak suda
Di kajar lari dengan guliga