Muka nya bulat mujor siray
Pinggang nya kachik orang nya putay
Sulam lukis-an smua panday
Tuntu lah kawin tak bolay mongkir 

Mak gua suda antar siray
Nanti kan hari blom sampay
Habis bli kain putay
Gunting baju Cheoh Thow mau pakay 

Kamarain suda antar kain
Nanti kan sahya pulang kawin
Sin Senh jangan chakap main
Sahya tak mau prompuan lain 

Sin Senh dengar Eng Tai ber-kata
Hati di dalam banyak susa
Eng Tai tak mau apa kan daya
Panggil lah Sam Pek mari bechara 

Sam Pek chepat ber-jalan datang
Sin Senh dudok ter-pandang pandang
Kata Sam Pek banyak gua sayang
Anak gua bolay lu tunang 

Kalu lu jadi menantu gua
Gua nanti kasi smua harta
Smua ka-pandian gua ajar
Kemdian hari besar kaya 

Sam Pek dengar besar ter-pranjat
Muka putay menjadi puchat
Tengok Sin Senh banyak ber-ajat
Hati di dalam macham di kiat 

Blom lah dapat jawap kata
Tengok Eng Tai main mata
Muka nya asam macham marah
Di gonchang kapala tak suda suda 

Sam Pek banyak susa hati
Bilang sama Sin Senh biar nanti
Nanti di pikir besok pagi
Kemdian bolay kabar ka-mari 

Sin Senh jawap kata yah lah
Lu bolay lah pergi bechara
Kalu jadi kasi tau gua
Bolay lah Sin Senh brati suka 

Eng Tai Sam Pek balek ber-dua
Sampay dudok sampay ber-kata
Kanapa adek begitu marah
Di gonchang kapala tak suda suda