Dia pergi di Katok Batu
Orang hantam gayong susu
Kita si pekong punya chuchu
Suda mabok macham antu 

Dia mau balek di Gaylang
Kapala mabok mata gambang
Sala kaki masok longkang
Sampay jatoh tidor ter-lantang 

Eng Tai bilang sama Sam Pek
Sunggu ber-cheray kita adek bradek
Pikiran lain jangan Ankoh amek
Suda tuntu kita tak bolay baylek 

Main apa toksa Ankoh pikir kan
Asa ingat sahya punya adek prompuan
Kasi kan Ankoh buat kawan
Bolay sahya tumpang ka-suka-an 

Saman s?karang punya maknusia
Ka-banyak-an pandang wang sedia
Kalu ada ringget ber-laksa
Baru dia mengaku sudara 

Nama saja panggil Chin Chek Kan
Orang di luar baik ber-kawan
Kalu ada wang di badan
Lagi jaoh sudara bangket kan 

Bukan nya sahya chakap sia sia
Kalu Ankoh kurang per-chaya
Chobak tanya orang tua tua
Ada batol s?begitu atau tiada 

Suda habis Eng Tai ber-pesan
Baru di siap kan bungkusan
Payong di pegang s?bla tangan
Handak ikot taman nya ber-jalan 

Sam Pek tengok hati nya pilu
Kata sama Eng Tai adek ku
Dari mula kita ber-guru
Ini adek mau ber-jalan dulu 

Sam Pek Eng Tai handak ber-cheray
Dua dua menangis lah seday seday
Bilang nya Eng Tai jangan Ankoh kuatir
Jaga lah badan baik baik 

Ini hari kita cheray ber-dua
Mintak dokwa kapada Tuan Allah
Asa Ankoh brati sama
Dapat lah kita s?lamat smua