Sam Pek kluar sampay meletay
Kata adek tidor ter-chapay chapay
Kasi satu malam gua ter-pikir
Tidor tak dapat lelap tak bolay 

Eng Tai dudok sampay ber-kata
Usek s?dikit Ankoh mau marah
Apa guna kita ber-sumpa
Kata nya mau mati sama ber-dua 

Jangan lah Ankoh ter-lalu meletay
Kalu tak suka baik kita ber-chray
Ankoh jalan ka-kanan sahya ka-kiri
Masing masing chari huntong panday 

Sam Pek dengar hati ter-lalu susa
Tengok kan Eng Tai banyak marah
Sam Pek tak tau apa mau kata
Di pujok Eng Tai dengan ter-tawa 

Angkat nya korsi alas kan jok
Ajak Eng Tai ber-sama dudok
Jangan lah adek hati merajok
Mari lah dudok Ankoh memujok 

Eng Tai panggil Sam Pek Koh
Kita ber-jumpa pun satu jodoh
Hati adek bagi di sulor
Laotan tidak menjadi tohor 

Hati Ankoh kalu tidak ber-karat
Sahya pun tidak brati brat
Tutor s?pata dalam manipat
Lagi dunia sampay Akeirat 

Mata hari pun suda lah tinggi
Toksa kita ber-dengar di sini
Mari lah sama ber-jalan pergi
Lain tempat kita mau brenti 

Baru lah Sam Pek ber-suka hati
Tengok kan Eng Tai ber-sri sri
Masing masing kamas kan diri
Mau lah sama sama ber-jalan pergi 

Suda kamas s?luar dan baju
Sama sama lah lapas kaday itu
?. dia orang tuju
Mau lah sama sama ber-jalan pergi 

Eng Tai ber-jalan ter-paling paling
Sam Pek tengok mata ter-jeling
Apa adek ter-kling kling
Bagi lah tikus s?regar nya kuching