Eng Tai dengar besar ter-tawa
Di tengok Ankoh punya rupa
Bagi bunga puchok ber-dua
Penakot ber-jalan s?perti orang tua 

Apa kana Ankoh tidak ber-chakap
Adek ber-sama rasa tak sedap
Kaki pun blangka tak bolay tetap
Bagi orang jalan di glap 

Ankoh bukak lah satu chrita
Biar adek dengar bolay ter-tawa
Asa dapat hati ku legar
Jalan penat pun ter-rasa segar 

Sam Pek triak Eng Tai adek way
Chakap bohong gua tak bolay
Jangan lah adek banyak meletay
Chepat jalan bolay dras sampay 

Kalu mau tau chrita chrita
Ada satu orang yang paka
Dia dudok di gudang Lawyer
Depan gudang Johnston?s Pier 

Inchek Kim Boon
Salin Sam Kok dari kitab China
Kalam di tikam huruf pun kana
Kalu di bacha itu banyak ber-guna 

Ada lagi dua kitab yang trang
Inchek Leng Joo turun kan Cheng Say Cheng Tai
Sunggu banyak orang ter-bilang
Adu kan Sam Kok tak bolay dia menang 

Dia bacha oleh malam pukol tuju
Kanak kanak datang ber-debu debu
Apa Inchek mem-bacha itu
Huruf Ingris bahasa Melayu 

Lain ada Sow Pak Whan Tong
Kitab itu ber-sambong sambong
Chrita Tong Teow smua bohong
Kalu tekun kan menjadi mingong 

Pranakan Pranakan banyak lah suka
Chrita Gong Kiah Sye bli ber-tamba
Bacha oleh kasi orang ter-tawa
Di turot kan maksud itu kitab gila 

Adek kalu mau plajaran baik
Kitab Sam Kok dan Sahir kaid
Baru pikiran bolay naik
Jangan di simpan chrita