Sin Khek bawak plita bertungku
Diputal kluar dua sumbu
Pasang api ber-debu debu
John Little punya nombor satu 

Api pasang banyak trang
Nanti Sin Khek blom datang
Eng Tai kata hati gua gambang
Mari lah kita tidor di ranjang 

Sam Pek bilang kanapa begitu
Sin Khek pulang pukol tuju
Lu mau tidor tidor lah dulu
Gua nanti jaga kan pintu 

Eng Tai kata bukan begitu
Prot di dalam ber-deru deru
Tolong chari kan satu chupu
Gua ingat mau makan susu 

Sam Pek kata adek gila
Mau makan susu sini takda
Pergi chari di Singapura
Rumah susu Bye baru ada 

Eng Tai kata kalu begitu
Tuntu lah mati gua dulu
Dia tahan napas ber-jeru jeru
Muka nya merah sampay biru 

Bukan kapalang Sam Pek takot
Gonchang tangan nya di atas prot
Panggil adek tak brenti mulot
Di bangun kan Eng Tai sampay terkentot 

Eng Tai buat buat tak sedar
Di tanya Ankoh apa pasal
Gua tidor sala kah bantal
Ankoh buat gua sampay ber-gumpal 

Sam Pek kaat Eng Tai adek
Puas lah suda gua ber-pakek
Mata adek tak mau di chelek
Itu gua dukong kasi bangkek 

Jangan lah adek buat begitu
Gua mau pergi bli susu
Kalu jumpa saitan antu
Gua mintak lah mati dulu 

Eng Tai bilang Ankoh toksa
Badan gua suda baik rasa
Sin Senh pulang chari takda
Sama gua jugak Sin Senh marah