Eng Tai kata nanti s?kajap
Hari pun suda glap
Satu apa blom siap
Nanti besok bolay tetap 

Apa macham Baba rasa
Mau kah pulang atau tidak
Sahya mau lah balek di rumah
Mintak lah Baba kasi kabar 

Eng Tai panggil sama Sam Pek
Ajak masok di dalam bilek
Kata taman gua datang charek
Kita ber-cheray lah adek bradek 

Jangan Ankoh amek susa
Kita ber-cheray s?kajap saja
Bila Ankoh mau pulang rumah
Rumah adek lah Ankoh singga 

Adek pesan jangan lupa
Kalu pulang mesti singga
Banyak maksud adek mau kata
Nanti di rumah bolay bechara 

Pasal adek prompuan sahya
Pada Ankoh suda sahya kata
Umor nya chukop s?macham sahya
Mesti mau kawin tak bolay lenga 

Dras dras Ankoh datang
Dilin besar adek pasang
Muka Sin Neo Ankoh pandang
Jiwa Ankoh tuntu hilang 

Rumah sahya Ankoh sampay
Anak taman tuang kan ayer tay
Di panggil Baba Nyonya si putay
Minom ayer makan nya kuay 

Smua orang panggil Baba
Kasi tinggal rumah s?bla
Kluar masok dudok kreta
Sin Khek Hyelam nanti jaga 

Nanti di antar dua tiga taman
Jaga kan Ankoh punya pakian
Mana satu Ankoh ber-kanan
Bolay Ankoh amek pakay kan 

Mana satu Ankoh handak
Sama adek Ankoh mintak
Bolay jaga Ankoh punya Mak
Dengan nama Ankoh punya Bapak