Hati gua ter-lampon susa
Badan sakit tak tuntu rasa
Chobak Ankoh tolong raba
Prot di dalam bagi di pera 

Sam Pek dengar pikir kan ya
Amek lah tangan dia raba
Eng Tai buat buat bikin susa
Bukak baju tunjok kan dada 

Tangan Sam Pek ter-gosok gosok
Kata adek suda mengantok
Dada ter-bukak angin masok
Nanti dapat penyakit sampok 

Amek nya tangan tumbok kan tulang
Tanya adek suda kah senang
S?limot putay gua bantang
Adek tidor lah siang siang 

Eng Tai triak Sam Pek Koh
Badan gua ter-lampon lusoh
Kalu Ankoh tak sama ber-champor
Tuntu lah gua tak bolay tidor 

Gua biasa tidor ber-dua
Sama satu adek sudara
Kasi puas kan hati gua suda
Baru lah lelap mata gua 

Sam Pek ber-kata adek sudara
Gua tak biasa tidor ber-dua
Kalu kana orang mengusek saja
Satu malam tak tutop mata 

Krana adek ada sakit
Bolay lah gua tidor berempet
Mintak Tuan Allah hilang kan penyakit
Jangan lah adek mengampet gampet 

Eng Tai jawap Sam Pek Ankoh
Adek tidak begitu bodoh
Pesanan Ankoh gua tak kacho
Asa gua dapat melayang tidor 

Mari lah Ankoh tidor lakas
Badan adek merasa panas
Ankoh tolong amek kipas
Bantal adek tolong alas 

Sam Pek suda lah tidor baring
Eng Tai ber-balek tidor mengiring
Kata nya kapala banyak pusing
Prot sakit rasa mau kenching