Nama saja laok Nyonya Nyonya
Tukang nya masak Hylam smua
Dalam Singapura dia yang banyak
Smua yang ada me-nama nama 

Dia orang sewa satu kaday
Kompol ber-pakat memikin kuay
Nyonya Nyonya s?karang tak pakay
Sin Khek Hylam ter-lampon panday 

Sahya mau makanan Towkay Towkay
Rebus bras ayer nya mau labay
Masak nasik kluar kan ayer
Tajin nya tarok ber-ganti Tay 

Kalu ada pulak kledek putay
Masak kan bubor chayer chayer
Timun asin nama nya Chioh Kuay
Lain laok tak mau ku chapay 

Tumbok bawang putay masak kangkong
Tawchio China di masak rebong
Amek tawyu di goreng kan trong
Itu lah saja gua ka-lu-kong 

Tawkua goreng ber-champor kuchye
Udang kring di masak pekchye
Kobi China di bikin kua chap chye
Lain smua long-chong-em-sye 

Kuay bakol kuay koya
Pisang kaki masak merah
Manisan smua toksa lah
Itu saja lu tarok sedia 

Orang kaday itu suda ber-dengar kata
Amek lah kain sapu kan meja
Apa di bilang smua tarok sedia
Panggil dia orang dua dua lye-chiak 

Orang kaday itu suda sedia kan
Eng Tai triak Sam Pek mari makan
Jangan Ankoh menarok segan
Kita ber-sudara sama lah jantan 

Sam Pek dengar suda lah amek sumpet
Eng Tai datang dudok brempet
Apa lah mau bolay sahya amek
Makan sama kita adek bradek 

Sam Pek kata Eng Tai ku adek
Dudok makan biar sama ber-dayret
Jangan lah rapat brempet rempet
Orang panday pun banyak tak baik