Habis lah EngTai punya putal
Endah kan Sam Pek hilang akal
Tarek s?limot sorong bantal
Diam lah tidor sampay sedal 

Habis sedar pagi hari
Sin Senh panggil ber-sama pergi
Anak muret smua ka-mari
Sin Senh suru ajar mengaji 

Eng Tai Sam Pek dudok ber-dua
Anak muret smua ter-tawa
Nang ada panggil Apek Tua
Ada kata Sobat Anday gua 

Ada yang chakap ejek ejek
Ada yang datang dudok brempet
Amek jari di buat korek
Mau di ajak main usek 

Eng Tai dengar banyak marah
Muka nya putay menjadi merah
Pada Sin Senh pergi ber-kata
Anak muret banyak chilaka 

Dia orang tidak pergi tak-chek
Sari sari datang brempet
Tangan nya kacho jari nya korek
Dia mau ajak main usek 

Sin Senh dengar naik brapi
Rotan panjang Sin Senh bri
Satu satu Sin Senh kasi
Di pukol dia orang sampay menangis 

Sama dia orang Sin Senh bilang
Masing tempat masing orang
Siapa langgar undang undang
Nanti Sin Senh pukol di blakang 

Baru lah senang dua bradek
Tidak brani dia orang usek
Hilang Eng Tai punya cherdek
Sama Sam Pek tak bolay baylek 

Sam Pek satu orang yang lurus
Makan tidor mengaji tuntu
Eng Tai usek tak putus putus
Sam Pek tak mau masok pintu 

Tidak lah brani Eng Tai mengusek
Dudok blajar adek bradek
Tidor makan satu bilek
Bagi bunga kembang di petek