Eng Tai lah panggil Sam Pek Koh
Apa kana begitu bodoh
Kalu petang kita menyusor
Kalu malam kita tidor 

Mata ter-kajam lalu ter-chelek
Nampak satu orang yang chantek
Serta manchong serta molek
Bagi lah kembang bunga di patek 

Eng Tai bangun sampay ber-tanya
Ankoh Baba mau ka-mana
Kasi lah tau kapada sahya
Bolay lah kita ber-jalan sama 

Itu orng sambot ber-kata
Hamba lah mau pergi blajar
Negri Hang Chew di dalam kota
Tempat mengaji hamba kita 

Ini hari kita ber-jumpa
Blom lah tau nama sudara
Choba lah kabar dengan hamba
Bolay kita ber-jalan sama 

Eng Tai jawap sampay ber-kata
Hye Yoh Hye kasay sudara
Senh Cheok Eng Tai yah guna
Itu lah hamba punya nama 

Kalu mau pergi negri Hang Seah
Bolay lah kita ber-jalan sama
Sama apa sahya mau triak
Kasi lah Ankoh punya nama 

Kalu mau tau nama sahya
Senh Nio Sam Pek itu lah gua
Mari lah kita ber-jalan sama
Jangan lambat jangan lenga 

Chakap Sam Pek suda habis
Ajak Eng Tai mari lah pergi
Jangan lah kita ber-lenga lagi
Hari petang mana nak brenti