Skip to main content

Browse Items (2 total)

Tags: Pantun Minangkabau; Juaro Alek Nak Ka Tangah

Sort by:

(Sialek)

Kain ditanun rang Koto Gadang
Bapantang dipakai lusuah

Sahalai banang tak namuah larak
Dipakai anak puti-puti
Sunat kato dek baulang
Pasa jalan dek batampuah

Lazim di adat kawi di syarak
Buah panitahan dianjuang tinggi

Si kukuik babaju baling

Si Santi babaju suto
Kok dituntuik kami lah datang
Kok dinanti kami lah tibo

Buruang banamo reno ali
Nan inggok di kayu aro
Mancotok anak barabah
Anak mantilau dikaja pulo

Lah lamo adat di nagari
Elok pusako di nan tuo
Manantang juaro nak ka tangah
Di kami indak mangapo

Lah dalam adat nan bapakai
Lah dalam limbago nan batuang
Nan elok baiak ditalangkai

Nan buruak samo kito buang

Juaro Alek Nak Ka Tangah; Pantun Minangkabau

Tags: Indonesia, Juaro Alek Nak Ka Tangah; Pantun Minangkabau, Pantun Minangkabau; Juaro Alek Nak Ka Tangah

(Sipangka)

Takilek kappa nan gadang
Kappa nan datang dari Banja

Tantang muaro hilia mudiak
Ka tapi handak mandakok
Sarek muatan urang banyak
Nakodoh tagak di galadak

Balabuah kappa sakutiko
Sampai di hari nan kapatang
Alah baturuik dek sipangka
Mambawok pinang nan sacabiak

Mambawok pinang nan sagatok
Ka hadapan niniak dangan mamak
Sarato mandeh dangan bapak
Handak mahadiri karajo nagko

Lah tumbuah karambia tinggi
Tumbuah karambia nan sabatang
Pucuak dikanduang awan mego

Disakah anak bidodari
Lalu dibawok tabang tinggi
Baa toh nyo lai tu kini
Kok nan di hilia alek lah datang

Kok nan di mudiak alek lah tibo
Sipangka bagadang hati
Mananti alek mahadiri

Babunyi tabuah ampek-ampek
Tabuah larangan dang namonyo
Manyahuik tabuah nan banyak
Batingkah batikai-tikai

Takajuik buruang di rimbo
Kok suduik banamo ampek
Kok ririk baitu pulo
Kadudukan niniak dangan mamak

Alim ulama cadiak pandai
Sarato alek ka samonyo

Kayu gadang banyak babuah

Nan tumbuah di tangah koto
Manjulang ka langik tinggi
Daun nan tuo jatuah baserak
Nan mudo tingga di tampuaknyo

Kini juaro nak ka tangah
Manampuah ririk jo karajo
Kok ado taadok tabalakangi
Rilah jo maaf hambo pintak

Adat baitu dahulunyo

Juaro Alek Nak Ka Tangah; Pantun Minangkabau

Tags: Indonesia, Juaro Alek Nak Ka Tangah; Pantun Minangkabau, Pantun Minangkabau; Juaro Alek Nak Ka Tangah

Output Formats

atom, csv, dcmes-xml, json, omeka-xml, rss2